سحر ہاشمی کی پروڈیوسرز کے رویے پر تنقید، فنکاروں کے معاوضوں میں تاخیر کا معاملہ اٹھا دیا

لاہور (جانب منزل نیوز) پاکستانی اداکارہ سحر ہاشمی نے ڈرامہ انڈسٹری میں فنکاروں کو معاوضوں کی بروقت ادائیگی نہ ہونے پر پروڈیوسرز کے رویے کو تنقید کا نشانہ بنایا ہے۔
اداکارہ نے انسٹاگرام اسٹوری میں فنکاروں کو درپیش مسائل کی نشاندہی کرتے ہوئے کہا کہ اگر کوئی فنکار ایک دن تاخیر کرے تو اسے غیر پیشہ ور قرار دے دیا جاتا ہے، لیکن جب فنکاروں کے معاوضے مہینوں تک ادا نہ کیے جائیں تو اسے اکاؤنٹس کا مسئلہ قرار دے کر معاملہ ٹال دیا جاتا ہے۔
سحر ہاشمی کے بیان نے شوبز انڈسٹری میں فنکاروں کے حقوق، پیشہ ورانہ ذمہ داریوں اور معاوضوں کی بروقت ادائیگی سے متعلق بحث کو جنم دیا ہے۔
اداکارہ نے ڈرامہ سیریل ’ظلم‘ سے اپنے فنی سفر کا آغاز کیا اور ڈرامہ ’شیدائی‘ کے بعد انہیں نمایاں پذیرائی ملی۔ ڈرامہ ’زنجیریں‘ میں شہر بانو کے کردار نے بھی انہیں مقبولیت دلائی۔ سحر ہاشمی جلد ڈرامہ سیریل ’درِ نجات‘ میں خوش بخت کے نوجوان کردار میں دکھائی دیں گی۔