گرپتونت سنگھ پنوں کو پھر جان کا خطرہ، ایف بی آئی نے خبردار کر دیا

نیویارک (جانب منزل نیوز) بھارتی وزیراعظم نریندر مودی کے ناقد اور خالصتان تحریک کے رہنما گرپتونت سنگھ پنوں پر ایک بار پھر قاتلانہ حملے کا خطرہ سامنے آیا ہے۔ امریکی تحقیقاتی ادارے ایف بی آئی نے انہیں مبینہ طور پر فوری خطرے سے آگاہ کر دیا۔
میڈیا رپورٹس کے مطابق ایف بی آئی حکام نے نیویارک میں گرپتونت سنگھ پنوں کی رہائش گاہ کا دورہ کیا اور انہیں ان کی جان کو لاحق خطرات سے خبردار کیا۔ پنوں کا کہنا ہے کہ امریکی حکام اس معاملے میں ملنے والے سراغوں کی تحقیقات کر رہے ہیں۔
رپورٹس کے مطابق خطرے کا تعلق 18 اکتوبر کو کینیڈا کے شہر ایڈمنٹن میں ہونے والے خالصتان کے حق میں غیر سرکاری ریفرنڈم میں ان کی ممکنہ شرکت سے بھی جوڑا جا رہا ہے۔ یہ ریفرنڈم ان کی تنظیم سکھس فار جسٹس کی جانب سے منعقد کیا جا رہا ہے۔
گرپتونت سنگھ پنوں نے کہا کہ قتل کی دھمکیاں سکھ قوم کے حقِ خودارادیت کی جدوجہد کو نہیں روک سکتیں۔ تاہم حملے کے منصوبے اور خطرے سے متعلق تفصیلات کی آزادانہ تصدیق سامنے نہیں آئی۔