مسقط (جانب منزل نیوز) پاکستان اور عمان کے درمیان توانائی تعاون کو نئی تقویت مل گئی، پی ایس او اور عمان کی کمپنی او کیو ٹریڈنگ کے مابین پیٹرولیم مصنوعات کی خرید و فروخت کا معاہدہ طے پا گیا، جس کے تحت عمانی کمپنی پاکستان کو 200 ملین ڈالر کی کریڈٹ سہولت بھی فراہم کرے گی۔مسقط میں وفاقی وزیر پٹرولیم علی پرویز ملک اور عمان کے وزیر توانائی و معدنیات انجینئر سالم العوفی کی ملاقات میں معاہدے پر پیش رفت ہوئی، دونوں وزراء نے تیل، گیس اور معدنیات کے شعبوں میں دوطرفہ تعاون مزید بڑھانے پر اتفاق کیا۔معاہدے کے تحت پی ایس او کے لیے پیٹرولیم مصنوعات کی فراہمی کا باقاعدہ تجارتی فریم ورک قائم ہوگا، جبکہ پاکستان اور عمان کے درمیان آئل اینڈ گیس کے شعبے میں مشترکہ ورکنگ گروپ کے ذریعے تعاون کو مزید آگے بڑھایا جائے گا۔عمانی کمپنی او کیو ٹریڈنگ 2026 میں پی ایس او کو 10 لاکھ میٹرک ٹن سے زائد پیٹرول فراہم کر چکی ہے، جبکہ رواں سال کے اختتام تک پاکستان کو ایل پی جی کی فراہمی ایک لاکھ 20 ہزار میٹرک ٹن سے تجاوز کرنے کی توقع ہے۔معاہدہ پاکستان کی توانائی ضروریات پوری کرنے، پیٹرولیم درآمدات کے ذرائع متنوع بنانے، تجارتی تعلقات مضبوط کرنے اور سرمایہ کاری کے نئے امکانات پیدا کرنے کی جانب اہم پیش رفت قرار دیا جا رہا ہے۔





