لاہور (جانب منزل نیوز) پنجاب کی سیاست میں بیان بازی کا تنازع شدت اختیار کرگیا، وفاقی وزیر چودھری سالک حسین نے وزیراعلیٰ پنجاب مریم نواز شریف اور وزیر اطلاعات عظمیٰ بخاری کو ہتک عزت کے قانونی نوٹس بھجوا دیے، دونوں رہنماؤں سے 7 روز میں جواب اور غیر مشروط معافی کا مطالبہ کیا گیا ہے۔
تفصیلات کے مطابق چودھری سالک حسین نے 11 نومبر کو دونوں شخصیات کو قانونی نوٹس ارسال کیے۔ وزیراعلیٰ مریم نواز کو بھیجے گئے نوٹس میں 3 نومبر کو اٹک میں کی گئی تقریر کے دوران سالک حسین سے متعلق دیے گئے بیانات کو بنیاد بنایا گیا ہے۔
نوٹس میں مؤقف اختیار کیا گیا ہے کہ وزیراعلیٰ نے اپنی تقریر میں چودھری سالک حسین پر جھوٹے الزامات لگانے کا الزام عائد کیا اور گجرات میں ڈپٹی کمشنر کی تعیناتی کے معاملے پر بھی ان کا ذکر کیا۔ سالک حسین نے ان بیانات پر غیر مشروط معافی مانگنے کا مطالبہ کیا ہے۔
دوسری جانب وزیر اطلاعات عظمیٰ بخاری کو بھی 2 نومبر کی سوشل میڈیا پوسٹ پر قانونی نوٹس بھجوایا گیا ہے، جس میں انہوں نے گجرات میں اپنی پسند کا ڈپٹی کمشنر تعینات نہ ہونے کے معاملے پر سالک حسین کو تنقید کا نشانہ بنایا تھا اور انہیں شافع حسین سے حقائق معلوم کرنے کا مشورہ دیا تھا۔
نوٹس میں عظمیٰ بخاری سے بھی 7 روز کے اندر جواب اور غیر مشروط معافی طلب کی گئی ہے، بصورت دیگر قانونی کارروائی کا حق استعمال کرنے کا عندیہ دیا گیا ہے۔
ادھر عظمیٰ بخاری نے رابطہ کرنے پر مؤقف اختیار کیا کہ وزیراعلیٰ پنجاب اور انہیں تاحال کوئی قانونی نوٹس موصول نہیں ہوا، نوٹس موصول ہونے کے بعد اس کا جائزہ لیا جائے گا۔
یوں گجرات میں انتظامی تعیناتی سے شروع ہونے والا سیاسی اختلاف اب قانونی نوٹسز تک جا پہنچا ہے، جبکہ آئندہ چند روز میں اس معاملے پر مزید پیش رفت متوقع ہے۔





