دبئی (جانب منزل نیوز) بھارتی گلوکار اور نغمہ نگار رہگیر پہلی مرتبہ دبئی میں اپنی آواز کا جادو جگانے کے لیے تیار ہیں۔ 29 نومبر کو دی میٹروپولیٹن ہوٹل کے شندغہ بال روم میں ہونے والے کنسرٹ میں وہ اپنے مقبول گیتوں کے ساتھ نئے اور تاحال غیر ریلیز شدہ گانے بھی پیش کریں گے۔
راجستھان کے ایک چھوٹے سے قصبے سے تعلق رکھنے والے رہگیر کا اصل نام سنیل کمار گُرجر ہے۔ ان کی موسیقی کی خاص بات زندگی کے تلخ حقائق، معاشرتی رویوں اور انسانی جذبات کو سادہ الفاظ، منفرد انداز اور گہرے پیغام کے ساتھ پیش کرنا ہے۔
باب ڈیلن اور جانی کیش سے متاثر رہگیر پہلے آئی ٹی کے شعبے سے وابستہ تھے، تاہم موسیقی کے شوق نے انہیں ملازمت چھوڑ کر گلوکاری کی دنیا میں قدم رکھنے پر آمادہ کیا۔ انہوں نے اپنے سفر کا آغاز مختلف عوامی مقامات پر گلوکاری سے کیا اور رفتہ رفتہ اپنی الگ پہچان بنا لی۔
ان کے مشہور گیتوں میں ’’آدمی بھوتیا ہے‘‘، ’’میرے گاؤں آؤ گے‘‘ اور ’’کچا گھڑا‘‘ شامل ہیں۔ رہگیر کی موسیقی میں تلخ حقیقتوں کے ساتھ مزاح، امید، محبت اور انسان دوستی کے پیغامات بھی نمایاں ہیں۔
دبئی میں اپنے پہلے کنسرٹ کے حوالے سے گلوکار خاصے پُرجوش ہیں۔ تقریب کے ٹکٹس پلاٹینم لسٹ پر 145 درہم سے دستیاب ہیں۔





