آج کے دور میں بیرونِ ملک ملازمتوں کے لیے آن لائن پلیٹ فارمز پر انحصار بڑھنے کے ساتھ ساتھ دھوکہ دہی کے طریقے بھی زیادہ جدید اور پیچیدہ ہو گئے ہیں۔ خاص طور پر جعلی ویب سائٹس کے ذریعے لوگوں کو نوکریوں کے نام پر گمراہ کرنے کے واقعات میں اضافہ ہوا ہے۔
اکثر دھوکہ باز معروف اور قابلِ اعتماد اداروں کی ویب سائٹس جیسا ڈیزائن، لوگو اور مجموعی انداز نقل کر لیتے ہیں، لیکن ویب ایڈریس یو آر ایل میں معمولی سی تبدیلی کر دیتے ہیں جو پہلی نظر میں پکڑ میں نہیں آتی۔ اگر ویب ایڈریس کو غور سے نہ دیکھا جائے تو یہ ویب سائٹس بالکل اصلی لگتی ہیں، اور اسی وجہ سے لوگ غلطی سے غیر قانونی یا جعلی بھرتی کے نظام کا حصہ بن سکتے ہیں۔
کسی بھی آن لائن نوکری کے اشتہار کا جواب دینے، اپنی ذاتی معلومات دینے یا آن لائن درخواست فارم بھرنے سے پہلے انتہائی احتیاط برتی جائے۔ ویب سائٹ کی اصل حیثیت کو ضرور چیک کریں اور اس بات کو یقینی بنائیں کہ اس کا ویب ایڈریس بالکل درست اور سرکاری ذریعہ سے میل کھاتا ہو۔
یہ بات بھی اہم ہے کہ دھوکہ دہی کرنے والے صرف مالی نقصان تک محدود نہیں رہتے، بلکہ وہ حساس ذاتی معلومات جیسے شناختی دستاویزات، پاسپورٹ کی تفصیلات وغیرہ حاصل کرنے کی کوشش بھی کرتے ہیں۔ ان معلومات کا غلط استعمال شناختی چوری اور دیگر غیر قانونی سرگرمیوں میں ہو سکتا ہے، جس سے مستقبل میں بیرونِ ملک سفر اور روزگار کے مواقع شدید متاثر ہو سکتے ہیں۔
