پولینڈ گولیوں کی گھن گرج سے لرز اٹھا، کراکوف میں اندھا دھند فائرنگ سے 5 افراد ہلاک

کراکوف (جانب منزل نیوز) پولینڈ کے معروف سیاحتی شہر کراکوف کے مرکزی چوک میں فائرنگ کے ہولناک واقعے نے خوف و ہراس پھیلا دیا، مسلح شخص نے گاڑی میں سوار ہوکر راہگیروں کو نشانہ بنایا، جس کے نتیجے میں 5 افراد جان کی بازی ہار گئے جبکہ درجن سے زائد زخمی ہوگئے۔ زخمیوں میں پولیس اہلکار بھی شامل ہیں۔
غیر ملکی خبر رساں ادارے کے مطابق واقعہ ہفتے کی سہ پہر شہر کے تاریخی مین اسکوائر میں پیش آیا، جہاں سیاحوں اور شہریوں کی بڑی تعداد موجود ہوتی ہے۔ پولیس کے مطابق حملہ آور نے گاڑی کے ذریعے چوک میں داخل ہوکر لوگوں پر اندھا دھند فائرنگ شروع کردی۔
اطلاع ملتے ہی پولیس کی بھاری نفری موقع پر پہنچ گئی اور حملہ آور کا مقابلہ کیا۔ پولیس کارروائی کے دوران ملزم گولی لگنے سے زخمی ہوگیا۔ واقعے کے بعد علاقے کو گھیرے میں لے لیا گیا جبکہ ایمبولینسوں کے ذریعے زخمیوں کو اسپتال منتقل کیا گیا۔
پولینڈ کے وزیراعظم ڈونلڈ ٹسک نے واقعے کی تحقیقات جاری ہونے کی تصدیق کی، جبکہ صدر کارول ناوروکی نے متاثرین اور زخمیوں کے اہلِ خانہ سے دلی ہمدردی کا اظہار کیا۔
پولینڈ میں تعینات امریکی سفیر ٹام روز نے بھی حملے کی مذمت کرتے ہوئے کہا کہ امریکا اس مشکل گھڑی میں پولینڈ اور کراکوف کے شہریوں کے ساتھ کھڑا ہے۔