ملتان (جانب منزل نیوز) ملتان میں شیر شاہ پل کے قریب ریلوے کا ایک بڑا حادثہ پیش آیا ہے۔ کراچی سے پشاور جانے والی رحمان بابا ایکسپریس کی 14 بوگیاں پٹری سے اتر گئیں۔ صبح سوا پانچ بجے پیش آنے والے اس حادثے کے نتیجے میں 5 مسافر جاں بحق جبکہ 30 سے زائد زخمی ہوگئے ہیں۔ حادثے کے فوراً بعد ریسکیو اور انتظامیہ کی ٹیمیں موقع پر پہنچیں اور زخمیوں کو فوری طور پر نشتر ہسپتال ملتان منتقل کیا گیا۔
حادثے کے بعد متاثرہ مسافر اپنا سامان اٹھائے پٹری کے کنارے بیٹھے ہیں،اپ ٹریک پر ٹرینوں کی آمدورفت معطل ہو چکی ہے۔ ابتدائی اطلاعات کے مطابق ایک مسافر نے دعویٰ کیا ہے کہ روہڑی کے قریب ٹرین کی بوگی نمبر 9 کے نٹ بولٹ درست کیے گئے تھے، تاہم اس بیان کی آزادانہ تصدیق نہیں ہو سکی اور نہ ہی یہ واضح ہے کہ اس کا اس حادثے سے کوئی تعلق ہے۔ بعض ذرائع کی جانب سے ٹرین کی رفتار تیز ہونے کا بھی دعویٰ کیا جا رہا ہے، تاہم اصل وجوہات جاننے کے لیے تحقیقات کا آغاز کر دیا گیا ہے۔
وزیراعظم شہباز شریف نے ملتان میں رحمان بابا ایکسپریس کی بوگیاں پٹری سے اترنے کے واقعے کا سخت نوٹس لیتے ہوئے حادثے میں قیمتی جانوں کے ضیاع پر گہرے دکھ اور افسوس کا اظہار کیا ہے۔ وزیراعظم نے متعلقہ حکام کو فوری طور پر امدادی کارروائیاں تیز کرنے اور زخمیوں کو ہر ممکن بہترین طبی امداد فراہم کرنے کی ہدایت کی ہے
