دبئی عالمی کرپٹو انڈسٹری کا نیا مرکز بننے کو تیار

دبئی (جانب منزل نیوز) سنگاپور کے بعد اب دبئی عالمی کرپٹو، بلاک چین اور ویب تھری انڈسٹری کی توجہ کا مرکز بننے جا رہا ہے، عالمی ایونٹ ٹوکن 2049 دبئی میں اپریل 2027 میں منعقد ہوگا، جس میں ہزاروں ماہرین، سرمایہ کاروں اور ٹیکنالوجی کمپنیوں کی شرکت متوقع ہے۔
عالمی کرپٹو ایونٹ ٹوکن 2049 دبئی میں 21 اور 22 اپریل 2027 کو مدینۃ جمیرہ میں منعقد ہوگا۔ منتظمین کے مطابق ایونٹ میں 15 ہزار سے زائد شرکا، 4 ہزار سے زیادہ کمپنیوں، 200 سے زائد مقررین اور 200 سے زائد نمائش کنندگان کی شرکت متوقع ہے۔
ایونٹ میں ڈیجیٹل اثاثوں، بلاک چین، کرپٹو ایکسچینجز، سرمایہ کاری اور مالیاتی ٹیکنالوجی کے مستقبل پر تبادلہ خیال کیا جائے گا۔ عالمی سرمایہ کاروں، اسٹارٹ اپس کے بانیوں اور ٹیکنالوجی ماہرین کو کاروباری روابط اور سرمایہ کاری کے نئے مواقع تلاش کرنے کا موقع ملے گا۔
دبئی میں ڈیجیٹل اثاثوں اور ویب تھری شعبے کی بڑھتی ہوئی سرگرمیاں اسے عالمی ٹیکنالوجی انڈسٹری کے اہم مراکز میں شامل کر رہی ہیں۔ ٹوکن 2049 کا اگلا ایڈیشن 16 اور 17 جون 2027 کو نیویارک میں بھی منعقد ہوگا۔
پاکستان اور جنوبی ایشیا کی ٹیکنالوجی کمیونٹی کے لیے بھی یہ ایونٹ عالمی سرمایہ کاری، کاروباری شراکت داری اور کرپٹو انڈسٹری کے نئے رجحانات سے آگاہی حاصل کرنے کا اہم موقع بن سکتا ہے۔