دبئی (جانب منزل نیوز) عالمی بیوٹی انڈسٹری میں جدید ترین رجحانات اور بین الاقوامی کاروباری تعلقات کو مستحکم بنانے کے لیے منعقدہ تین روزہ نمائش بیوٹی ورلڈ دبئی 2026 اپنے اختتام کو پہنچ گئی۔
6 سے 8 اکتوبر تک جاری رہنے والے اس 30 ویں ایڈیشن میں پاکستان کی 19 ممتاز کمپنیوں نے ٹریڈ ڈیولپمنٹ اتھارٹی آف پاکستان کے پویلین تلے اپنی صلاحیتوں کا لوہا منوایا۔
پاکستانی نمائش کنندگان نے کاسمیٹکس، اسکن کیئر اور پرسنل کیئر مصنوعات کی وسیع رینج پیش کی، جسے بین الاقوامی خریداروں اور ڈسٹری بیوٹرز کی جانب سے خوب سراہا گیا۔
نمائش میں شریک کاس کاسمیٹکس کے چیف ایگزیکٹو آفیسر آصف نے پاکستانی پویلین کے انعقاد کو سراہتے ہوئے کہا کہ نمائش کے دوران پاکستان پویلین کو بہترین لوکیشن ملی جہاں بین الاقوامی خریداروں اور کاروباری نمائندوں نے پاکستانی مصنوعات میں گہری دلچسپی کا اظہار کیا۔ انہوں نے امید ظاہر کی کہ اس اقدام سے پاکستان کی بیوٹی انڈسٹری کے لیے برآمدات کے نئے راستے کھلیں گے۔
