دبئی (جانب منزل نیوز) متحدہ عرب امارات نے دبئی اور شارجہ کے درمیان ٹریفک کے بڑھتے ہوئے دباؤ سے نمٹنے کے لیے بڑا انفراسٹرکچر منصوبہ شروع کرنے کی تیاری کرلی ہے۔ وزارتِ توانائی و انفراسٹرکچر نے الاتحاد روڈ (E11) کے النہدہ انٹرسیکشن کی توسیع کے پہلے مرحلے کے لیے ٹینڈر جاری کردیا ہے۔
منصوبے کے تحت مجموعی طور پر 4 کلومیٹر طویل 8 نئے پل تعمیر کیے جائیں گے، جبکہ ٹریفک کی روانی بہتر بنانے کے لیے ساڑھے 4 کلومیٹر طویل سروس روڈز بھی بنائی جائیں گی۔
منصوبہ مکمل ہونے پر الاتحاد روڈ سے روزانہ گزرنے والی گاڑیوں کی گنجائش ایک لاکھ سے بڑھ کر ایک لاکھ 90 ہزار ہوجائے گی، جس سے استعداد میں 90 فیصد اضافہ ہوگا۔ اسی طرح النہدہ انٹرسیکشن کی گنجائش ایک لاکھ 88 ہزار سے بڑھ کر 3 لاکھ 10 ہزار گاڑیاں روزانہ تک پہنچنے کی توقع ہے۔
وزارت کے مطابق اہم شاہراہوں پر سفر کا دورانیہ 15 منٹ سے کم ہوکر صرف 3 منٹ رہ جائے گا۔ اس منصوبے سے دبئی اور شارجہ کے درمیان روزانہ سفر کرنے والے شہریوں اور ملازمین کو نمایاں سہولت ملنے اور ٹریفک جام میں کمی آنے کی امید ہے۔
ٹینڈر 19 نومبر 2026 کو جاری کیا گیا، جبکہ اہل تعمیراتی کمپنیوں کے لیے بولیاں جمع کرانے کی آخری تاریخ 5 جنوری 2027 مقرر کی گئی ہے۔





