لاہور(جانب منزل نیوز) صوبائی وزیرِ و وائس چیئرپرسن اوورسیز پاکستانیز کمیشن پنجاب بیرسٹر امجد ملک نے بیرونِ ممالک مقیم پاکستانیوں کی شکایات اور مسائل براہِ راست سننے کے لیے اوورسیز پاکستانیز کمیشن پنجاب کی ای کھلی کچہری کی صدارت کی۔
اس موقع پر کمشنر او پی سی حمیرا اکرام، ڈی جی او پی سی احمر نائیک، ڈائریکٹر ایڈمن عامر احمد خان، ڈائریکٹر ریونیو شعیب نسوانہ اور دیگر افسران بھی موجود تھے۔ای کھلی کچہری کے دوران بیرسٹر امجد ملک نے اوورسیز پاکستانیوں کے مسائل فرداً فرداً سنے۔ پراپرٹی ڈسپیوٹس سمیت مختلف شکایات پر متعلقہ افسران کو ضروری احکامات جاری کیے گئے تاکہ مسائل کو بروقت حل کیا جا سکے۔اوورسیز پاکستانیوں نے ای-کھلی کچہری کے انعقاد کو سراہا۔
انہوں نے کہا کہ یہ فورم ان کے لیے امید کی کرن بن چکا ہے، جہاں ان کی شکایات براہِ راست سنی جا رہی ہیں اور مسائل کے حل کے لیے فوری اقدامات کیے جا رہے ہیں۔بیرونِ ممالک مقیم پاکستانیوں نے ای کھلی کچہری کے طریقہ کار کو مزید مؤثر بنانے کے لیے اپنی تجاویز بھی پیش کیں۔ شرکاء نے تجویز دی کہ شکایات کے ازالے کے عمل کو مزید تیز کرنے کے لیے ای کھلی کچہری ہر پندرہ روز بعد منعقد کی جائے۔آئندہ ای-کھلی کچہری 23 ستمبر کو منعقد ہوگی۔
