بارسلونا (جانب منزل نیوز) چیئرمین اوورسیز پاکستانیز فاؤنڈیشن سید قمر رضا شاہ نے پاکستان ہاؤس بارسلونا کا دورہ کیا۔ قونصل جنرل آف پاکستان مراد علی وزیر نے ان کا پرتپاک استقبال کیا۔
قونصل جنرل مراد علی وزیر کی جانب سے سید قمر رضا شاہ کے اعزاز میں خصوصی ناشتے کا اہتمام کیا گیا۔ برطانیہ کی معروف کاروباری شخصیت عامر خان بھی ناشتے میں شریک ہوئے۔
ناشتے میں کمیونٹی ویلفیئر اتاشی چوہدری سالک محمود، صدارتی ایوارڈ (تمغہ امتیاز) یافتہ بزنس مین چوہدری امانت حسین مہر، چوہدری شعیب ورک، پرویز اختر جانی، چوہدری صابر تارڑ، حافظ عبدالرزاق صادق، ملک محمد شریف اور عمران فردوس نے بھی شرکت کی۔
اس موقع پر خوشگوار ماحول میں باہمی دلچسپی کے امور پر تبادلہ خیال کیا گیا، جبکہ اسپین میں مقیم پاکستانی کمیونٹی، اوورسیز پاکستانیوں کی فلاح و بہبود اور پاکستان کے ساتھ ان کے روابط کو مزید مضبوط بنانے کے حوالے سے بھی گفتگو ہوئی۔
قونصل جنرل مراد علی وزیر نے سید قمر رضا شاہ کو پاکستان ہاؤس آمد پر خوش آمدید کہتے ہوئے ان کے دورہ بارسلونا کو اوورسیز پاکستانی کمیونٹی کے ساتھ روابط کے فروغ کے لیے اہم قرار دیا۔ چیئرمین اوورسیز پاکستانیز فاؤنڈیشن سید قمر رضا شاہ نے شاندار میزبانی اور پرتپاک استقبال پر قونصل جنرل مراد علی وزیر کا شکریہ ادا کیا۔
