راولپنڈی (جانب منزل نیوز) پاکستان تحریک انصاف کے بانی اور سابق وزیراعظم عمران خان نے اڈیالہ جیل سے چیف جسٹس آف پاکستان، چیف جسٹس وفاقی آئینی عدالت اور چیف جسٹس اسلام آباد ہائی کورٹ کے نام اوپن لیٹر ارسال کرتے ہوئے اپنی اور اہلیہ بشریٰ بی بی کی طبی حالت، قیدِ تنہائی، اہل خانہ اور وکلا سے ملاقاتوں پر پابندیوں سمیت عدالتی احکامات پر عملدرآمد نہ ہونے کے معاملات اٹھا دیے ہیں۔
16 نومبر 2026 کو جاری کیے گئے اس خط کا عنوان ’’انسانی بنیادوں پر طبی علاج اور عدالتی احکامات پر عملدرآمد کی اپیل‘‘ رکھا گیا ہے۔ خط عمران خان کے وکیل بیرسٹر سلمان صفدر کے توسط سے ارسال کیا گیا ہے۔ وکیل کے مطابق انہوں نے 11 نومبر 2026 کو اڈیالہ جیل میں بانی پی ٹی آئی سے تقریباً تین گھنٹے ملاقات کی، جہاں انہیں دی گئی ہدایات اور نوٹس کی روشنی میں یہ خط مرتب کیا گیا۔
بانی پی ٹی آئی نے اپنے خط میں کہا ہے کہ وہ یہ اپیل سابق وزیراعظم یا کسی سیاسی جماعت کے سربراہ کی حیثیت سے نہیں بلکہ ایک ایسے قیدی کی حیثیت سے کر رہے ہیں جس کی آواز جیل کی دیواروں سے باہر پہنچانے کا واحد ذریعہ ان کے وکیل ہیں۔ ان کا کہنا ہے کہ انہوں نے اپنی زندگی پاکستان کے لیے وقف کی، کرکٹ، سماجی خدمات، فلاحی سرگرمیوں اور وزارت عظمیٰ کے ذریعے ملک کی خدمت کی، تاہم ستر برس کی عمر کے بعد انہیں سیاسی انتقامی کارروائیوں، متعدد مقدمات اور عدالتی پیشیوں کا سامنا کرنا پڑا۔
خط میں عمران خان نے دعویٰ کیا کہ 20 دسمبر 2025 کو توشہ خانہ کیس کا فیصلہ آنے کے بعد انہیں بیرونی دنیا سے مکمل طور پر الگ کر دیا گیا اور دن کے بائیس گھنٹے تک قیدِ تنہائی میں رکھا گیا۔ ان کے مطابق اس دوران اہل خانہ، وکلا اور بیٹوں سے رابطے، کتابوں اور ٹیلی ویژن تک رسائی بھی نہیں تھی۔
عمران خان نے لکھا کہ کئی ماہ تک وکلا تک رسائی نہ ملنے کے بعد سپریم کورٹ کی جانب سے امیکس کیوری مقرر کیے جانے پر ان کے وکیل 10 فروری 2026 کو ان سے مل سکے۔ اس ملاقات میں انکشاف ہوا کہ ان کی دائیں آنکھ کی بینائی 85 فیصد تک متاثر ہو چکی تھی، تاہم ان کے مطابق اس سنگین صورتحال سے نہ اہل خانہ کو آگاہ کیا گیا اور نہ ہی ان کے وکلا کو۔
خط میں مزید کہا گیا ہے کہ رواں سال انہیں اپنے وکیل سے صرف چار مرتبہ، 10 فروری، 8 اپریل، 2 نومبر اور 11 نومبر کو ملاقات کی اجازت دی گئی، جبکہ ان کی اہلیہ بشریٰ بی بی کو پورے سال میں صرف ایک مرتبہ اپنے وکیل سے ملنے دیا گیا۔ عمران خان نے اسے جیل مینول، جیل قوانین اور قیدی کے بنیادی قانونی حقوق کی خلاف ورزی قرار دیا ہے۔
سابق وزیراعظم نے قیدِ تنہائی کے باعث اپنی ذہنی صحت متاثر ہونے کا بھی ذکر کیا اور کہا کہ جیل کے اپنے میڈیکل بورڈ نے ان کی بے چینی اور ذہنی دباؤ کو ریکارڈ کرتے ہوئے اہلیہ اور خاندان سے زیادہ رابطے، مطالعے کے لیے مواد اور ٹیلی ویژن کی سہولت فراہم کرنے کی سفارش کی تھی، لیکن ان کے مطابق ان سفارشات پر عمل نہیں کیا گیا۔
بانی پی ٹی آئی نے شکایت کی کہ ان کی اہلیہ سے ہفتہ وار ملاقات، جو ان کے لیے انسانی رابطے کا واحد ذریعہ ہے، جیل حکام کی جانب سے بار بار منسوخ کر دی جاتی ہے۔ ان کا کہنا ہے کہ ان کی تین بہنیں بھی حراست میں ہیں اور انہیں ان سے ملاقات کی اجازت نہیں دی جا رہی۔ ان کے بیٹوں قاسم اور سلیمان سے ٹیلی فون پر بات کرنے کی اجازت نہ دینے کو بھی انہوں نے عدالتی احکامات کے منافی قرار دیا۔
خط میں بشریٰ بی بی کی صحت اور بینائی کے حوالے سے بھی تشویش کا اظہار کیا گیا ہے۔ عمران خان کے مطابق رواں ماہ اہلیہ سے ملاقات کے دوران وہ روشنی برداشت کرنے اور آنکھیں کھولنے سے بھی قاصر تھیں، جبکہ مزید سرجری نہ ہونے کی صورت میں ان کی بینائی مستقل طور پر ضائع ہونے کا خدشہ ہے۔ انہوں نے الزام عائد کیا کہ اہلیہ کے طبی ریکارڈ تک رسائی نہیں دی جا رہی، ڈاکٹروں سے ملاقات میں رکاوٹیں ہیں اور ان کی سزا معطلی کی درخواست بھی زیر سماعت نہیں آ رہی۔
اوپن لیٹر میں عمران خان نے 18 اگست 2026 کے سپریم کورٹ کے تین رکنی بینچ کے حکم کا حوالہ دیتے ہوئے کہا کہ عدالت نے جیل کی اپنی رپورٹ اور ان کی بگڑتی ہوئی صحت کو مدنظر رکھتے ہوئے انہیں دو روز کے اندر شفا انٹرنیشنل اسپتال منتقل کرنے، ماہر امراض قلب اور آنکھوں کے اسپیشلسٹ پر مشتمل میڈیکل بورڈ سے معائنہ کرانے اور خاندان سے ہفتہ وار ملاقات کی اجازت دینے کا حکم دیا تھا۔ خط کے مطابق عدالت نے ان کے بیٹوں سے ہفتے میں دو مرتبہ بات کرنے کی ہدایت بھی کی تھی، تاہم عمران خان کا دعویٰ ہے کہ ان احکامات پر تاحال عملدرآمد نہیں ہوا۔
عمران خان نے اپنی صحت کے حوالے سے بتایا کہ قیدِ تنہائی کے دوران ان کا بلڈ پریشر مسلسل بڑھ رہا ہے، جو پہلے 130، پھر 150 اور 170 تک پہنچا جبکہ 10 نومبر 2026 کو یہ 192 اور 193 ریکارڈ کیا گیا۔ ان کے مطابق ڈاکٹروں نے انہیں دماغی شریان پھٹنے اور دل کے دورے کے شدید خطرات سے آگاہ کیا ہے اور ان کے دل کو بھی نقصان پہنچ چکا ہے۔
انہوں نے خط میں وفاقی آئینی عدالت میں زیر التوا مقدمے کا ذکر کرتے ہوئے کہا کہ ان کی صحت، اہلیہ کی بینائی اور سپریم کورٹ کے احکامات پر عملدرآمد جیسے اہم معاملات توجہ کے منتظر ہیں، جبکہ ان کے بقول القادر اپیل کی سماعت پرانے مقدمات سے پہلے مقرر کی جا رہی ہے۔ انہوں نے اس صورتحال پر افسوس کا اظہار کرتے ہوئے کہا کہ ان کی زندگی، بنیادی حقوق اور صحت کے معاملات کو نظرانداز کیا جا رہا ہے۔
عمران خان نے اپنے خط کے اختتام پر واضح کیا کہ وہ کسی خصوصی رعایت یا ذاتی فائدے کے طلبگار نہیں بلکہ سپریم کورٹ کے احکامات پر عملدرآمد، مناسب طبی سہولیات اور اپنی اہلیہ کے علاج کے خواہاں ہیں۔ انہوں نے تینوں عدالتی شخصیات سے انسانی ہمدردی کی بنیاد پر مداخلت کی اپیل کرتے ہوئے کہا کہ وہ اپنی بے گناہی ثابت کرنے کے لیے قانونی جنگ جاری رکھنا چاہتے ہیں، لیکن اس کے لیے ان کا زندہ رہنا ضروری ہے۔
انہوں نے اپیل کی کہ انہیں انصاف فراہم کیا جائے، اس سے پہلے کہ بہت دیر ہو جائے۔





