بارسلونا(جانب منزل نیوز)اوورسیز جرنلسٹ ایسوسی ایشن کا اہم اجلاس قرطبہ ریسٹورنٹ، کائیے قرطبہ، بارسلونا میں صدر حافظ احمد کی زیرِ صدارت ہوا، جس میں اسپین بالخصوص بارسلونا میں نئے آنے والے پاکستانی صحافیوں کو تنظیم کے پلیٹ فارم سے خوش آمدید کہتے ہوئے صحافتی برادری کے باہمی روابط اور پیشہ ورانہ تعاون کو مزید مضبوط بنانے پر تبادلہ خیال کیا گیا۔
اجلاس میں اوورسیز جرنلسٹ ایسوسی ایشن کے جنرل سیکرٹری محمد طارق رفیق بھٹی نے ایسوسی ایشن کے اغراض و مقاصد، صحافیوں کے پیشہ ورانہ مفادات کے تحفظ اور مستقبل کے لائحہ عمل پر شرکاء کو بریفنگ دی۔ انہوں نے کہا کہ OJA بیرونِ ملک پاکستانی صحافیوں کو ایک مؤثر پلیٹ فارم فراہم کرنے اور باہمی تعاون کو فروغ دینے کے لیے اپنا کردار جاری رکھے گی۔
اجلاس میں فنانس سیکرٹری بابر علی چوہدری، وسیم رزاق سنو نیوز، ثاقب علی راٹھور (اسپین ٹوڈے اردو)، ارشدانجم ڈسکور پاکستان، انس گوندل (نیوز ون)، ناصر رفیق (ڈان نیوز)، میاں علاؤالدین (دنیا نیوز پاکستان) اور بابر بشیر 89نیوزسمیت دیگر صحافیوں نے شرکت کی، جبکہ چوہدری انس گوندل، اشفاق مغل، اسد الرحمان (بول نیوز) اور ارشد نذیر ساحل نے آن لائن شرکت کی۔ اجلاس کے دوران نئے صحافیوں کو OJA میں شمولیت کی دعوت دی گئی، جس پر نئے ارکان نے تنظیم کا حصہ بننے پر آمادگی ظاہر کی۔
شرکاء نے اس پیش رفت کو بیرونِ ملک پاکستانی صحافیوں کے اتحاد اور تنظیمی استحکام کی جانب اہم قدم قرار دیا۔اس موقع پر ارشد انجم، ڈائریکٹر انٹرنیشنل افیئرز ڈسکور پاکستان نے کہا کہ بیرونِ ملک پاکستانی صحافی نہ صرف پاکستان کا مثبت تشخص اجاگر کرنے میں اہم کردار ادا کر رہے ہیں بلکہ کمیونٹی کے مسائل کو اجاگر کرنے میں بھی ان کی خدمات قابلِ قدر ہیں۔ انہوں نے کہا کہ صحافیوں کے درمیان اتحاد، پیشہ ورانہ روابط اور باہمی تعاون وقت کی اہم ضرورت ہے۔اجلاس میں مستقبل کی سرگرمیوں، نئے صحافیوں کی رہنمائی اور صحافتی برادری کے باہمی روابط کو مزید مؤثر بنانے پر بھی اتفاق کیا گیا۔
