دبئی(جانب منزل نیوز) پاکستان پیپلز پارٹی گلف و اوورسیز پاکستانیز یونائیٹڈ فورم کے زیرِ اہتمام پاکستان کا 79واں یومِ آزادی دبئی کے دی لیلا ہوٹل میں شاندار، پروقار اور قومی جذبے سے سرشار تقریب کے دوران منایا گیا۔
تقریب میں پاکستانی کمیونٹی، کاروباری شخصیات، پارٹی کارکنان و عہدیداران اور مختلف شعبہ ہائے زندگی سے تعلق رکھنے والی شخصیات نے بڑی تعداد میں شرکت کی۔ تقریب کی صدارت پاکستان پیپلز پارٹی گلف و مڈل ایسٹ کے صدر میاں منیر ہانس نے کی، جبکہ قاضی محمد بشیر ایڈووکیٹ، صدر پیپلز لائرز فورم سندھ مہمانِ خصوصی اور ڈاکٹر بو عبداللہ، چیئرمین بو عبداللہ گروپ مہمانِ اعزاز تھے۔ خواجہ اویس ایڈووکیٹ نے بھی خصوصی شرکت کی۔
تقریب کی نظامت ملک اسلم، ایڈیشنل سیکرٹری جنرل نے کی۔ ڈاکٹر بو عبداللہ، قاضی محمد بشیر، میاں منیر ہانس، خواجہ اویس، قیصر آفریدی، عرفان قمر گوندل، نوفل عالم، ممتاز جونیجو، شفیق صدیقی اور فرہاد کاظمی سمیت دیگر پارٹی رہنماؤں اور عہدیداران نے خطاب کیا۔
مقررین نے اپنے خطابات میں پاکستان کی آزادی کی اہمیت، ملکی ترقی، استحکام اور خوشحالی کے لیے اجتماعی کردار کی ضرورت پر زور دیا۔ انہوں نے بیرونِ ملک مقیم پاکستانیوں کی جانب سے وطنِ عزیز کی ترقی اور مثبت تشخص کے لیے کی جانے والی کاوشوں کو بھی سراہا۔ مقررین نے پاکستان اور متحدہ عرب امارات کے دیرینہ برادرانہ تعلقات کو مزید مضبوط بنانے پر زور دیتے ہوئے دونوں ممالک کے درمیان تجارتی، کاروباری اور باہمی روابط کے فروغ کو وقت کی اہم ضرورت قرار دیا۔
تقریب میں چوہدری خالد حسین، ڈاکٹر ظفر طاہر، زاہد ندیم، فہد اسد، نوبہار صفدر، ڈاکٹر عباس قریشی، شاہد بنگش، چوہدری رضا قادری، اسد علی خان، ادریس خان، خالد بھٹی، لاؤس خان، چاچا پاکستانی اور عائشہ منیر ہانس سمیت خواتین کی بڑی تعداد نے بھی شرکت کی۔ تقریب کے دوران پاکستان کے 79ویں یومِ آزادی کی مناسبت سے کیک کاٹا گیا۔
شرکاء نے ملی جوش و جذبے کے ساتھ پاکستان سے اپنی محبت، عقیدت اور وابستگی کا اظہار کیا۔اختتام پر اطاعت حسین وارثی نے پاکستان کی سلامتی، ترقی، خوشحالی اور امتِ مسلمہ کے لیے خصوصی دعا کروائی۔ شرکاء نے اس عزم کا اظہار کیا کہ بیرونِ ملک مقیم پاکستانی وطنِ عزیز کی ترقی، خوشحالی اور مثبت تشخص کے لیے اپنا کردار جاری رکھیں گے۔
