دبئی (جانب منزل نیوز) دبئی میں ٹریفک کی روانی بہتر بنانے اور شہریوں کو تیز رفتار سفری سہولتیں فراہم کرنے کے لیے ایک اور اہم سنگ میل عبور کر لیا گیا۔ ورلڈ ٹریڈ سینٹر راؤنڈ اباؤٹ ڈیولپمنٹ منصوبے کا پانچواں اور آخری پل بھی ٹریفک کے لیے کھول دیا گیا، جس کے ساتھ 696 ملین درہم سے زائد لاگت کا بڑا ترقیاتی منصوبہ مکمل ہوگیا۔
دبئی روڈز اینڈ ٹرانسپورٹ اتھارٹی (آر ٹی اے) کے مطابق ایک کلومیٹر طویل نیا پل المجلِس اسٹریٹ کو سیکنڈ دسمبر اسٹریٹ سے ملاتا ہے۔ دو لین پر مشتمل اس پل سے فی گھنٹہ تقریباً 3 ہزار گاڑیاں گزر سکیں گی، جبکہ دونوں سڑکوں کے درمیان سفر کا دورانیہ 6 منٹ سے کم ہو کر صرف ایک منٹ رہ جائے گا۔
منصوبے کی تکمیل سے ورلڈ ٹریڈ سینٹر کے مصروف چوراہے پر ٹریفک کا دباؤ کم ہونے اور گاڑیوں کے انتظار کا اوسط وقت 12 منٹ سے گھٹ کر تقریباً 90 سیکنڈ رہنے کی توقع ہے۔ پانچوں پلوں کا مجموعی نیٹ ورک تقریباً 5 کلومیٹر طویل ہے، جو دبئی کے مختلف اہم علاقوں کو بہتر انداز میں آپس میں منسلک کرے گا۔
اس منصوبے سے جمیرا، السطوہ، دبئی ورلڈ ٹریڈ سینٹر، ڈی آئی ایف سی، دیرہ اور زعبیل سمیت متعدد علاقوں کے رہائشیوں اور سیاحوں کو فائدہ پہنچے گا۔ آر ٹی اے کے مطابق 5 لاکھ سے زائد افراد اس جدید ٹریفک انفراسٹرکچر سے مستفید ہوں گے۔
دوسری جانب المستقبل اسٹریٹ کی توسیع کا منصوبہ بھی جاری ہے، جس کی تکمیل 2027 میں متوقع ہے۔ اس منصوبے کے تحت سڑک کو مزید کشادہ کرنے کے ساتھ پل اور سرنگیں بھی تعمیر کی جائیں گی۔
دبئی میں جدید سڑکوں اور پلوں کا یہ وسیع نیٹ ورک نہ صرف روزمرہ سفر کو آسان بنائے گا بلکہ شہر کے تجارتی، کاروباری اور سیاحتی مراکز کے درمیان رابطوں کو بھی مزید تیز اور مؤثر بنانے میں اہم کردار ادا کرے گا۔
