کراچی (جانب منزل نیوز) پاکستان کے سابق کرکٹر سلیم یوسف کی صاحبزادی اور معروف اداکارہ ایمن سلیم نے پاکستان پیپلز پارٹی میں باضابطہ شمولیت کا اعلان کر دیا ہے۔ اداکارہ نے پیپلز پارٹی سندھ کے صدر نثار کھوڑو کے ہمراہ پریس کانفرنس میں اپنے سیاسی سفر کے آغاز کا اعلان کیا اور پارٹی میں شمولیت کی وجوہات بھی بیان کیں۔
ایمن سلیم کا کہنا تھا کہ انہوں نے شہید محترمہ بے نظیر بھٹو سے متاثر ہو کر پیپلز پارٹی میں شمولیت کا فیصلہ کیا ہے۔ وہ بے نظیر بھٹو کی بہت بڑی مداح رہی ہیں، جنہوں نے انہیں کم عمری میں یہ سکھایا کہ لڑکی کے خواب چھوٹے نہیں ہوتے اور خوابوں کی کوئی صنف نہیں ہوتی۔
اداکارہ نے کہا کہ ملکی سیاست میں قدم رکھنے کا فیصلہ محض سیاسی سرگرمی نہیں بلکہ اپنے لوگوں اور عوام سے کیا گیا ایک وعدہ ہے۔ وہ اپنے ملک اور عوام کی دل سے، بلا غرض خدمت کرنا چاہتی ہیں اور اس مقصد کے لیے انہیں ملنے والے پلیٹ فارم کو بروئے کار لائیں گی۔
ایمن سلیم نے صدرِ مملکت آصف علی زرداری، پیپلز پارٹی کے چیئرمین بلاول بھٹو زرداری اور پارٹی کی سینئر رہنما فریال تالپور کی قیادت پر بھی اعتماد کا اظہار کیا۔
اس موقع پر پیپلز پارٹی سندھ کے صدر نثار کھوڑو نے ایمن سلیم کی پارٹی میں شمولیت کا خیرمقدم کرتے ہوئے خوشی کا اظہار کیا۔ انہوں نے اداکارہ کی شمولیت پر اطمینان کا اظہار کیا اور پارٹی کی سیاسی سرگرمیوں میں ان کی شرکت کو خوش آئند قرار دیا۔
ایمن سلیم کی پیپلز پارٹی میں شمولیت ان کے لیے شوبز کے بعد عملی سیاست میں ایک نئے سفر کا آغاز ہے۔ اداکارہ نے عوامی خدمت کو اپنے سیاسی سفر کا بنیادی مقصد قرار دیا ہے۔
