پاک روس تعلقات میں نیا باب ،،، روسی وزیر داخلہ کا شاندار استقبال

اسلام آباد (جانب منزل نیوز) روس کے وزیر داخلہ ولادیمیر کولاکولتسیف چار روزہ سرکاری دورے پر پاکستان پہنچ گئے۔ یہ کسی بھی روسی وزیر داخلہ کا پاکستان کا پہلا دورہ ہے، جسے دونوں ممالک کے درمیان دوطرفہ تعلقات اور سکیورٹی تعاون کے فروغ کے حوالے سے اہم پیش رفت قرار دیا جا رہا ہے۔
روسی وزیر داخلہ ولادیمیر کولاکولتسیف وزیر داخلہ محسن نقوی کی دعوت پر پاکستان آئے ہیں۔ اسلام آباد آمد پر وزیر مملکت طلال چوہدری نے معزز مہمان کا پرتپاک استقبال کیا۔
دورے کے دوران روسی وزیر داخلہ پاکستانی قیادت سے اہم ملاقاتیں کریں گے، جن میں پاکستان اور روس کے دوطرفہ تعلقات، باہمی تعاون کے فروغ اور مختلف شعبوں میں اشتراکِ عمل بڑھانے سے متعلق امور زیرِ بحث آئیں گے۔
ولادیمیر کولاکولتسیف کے اس دورے کو دونوں ممالک کے درمیان اعلیٰ سطح کے روابط مضبوط بنانے کے لیے اہم قرار دیا جا رہا ہے۔ پاکستان اور روس کے درمیان تعاون کے نئے امکانات کا جائزہ لینے کے ساتھ ساتھ متعلقہ اداروں کے مابین روابط کو مزید مستحکم بنانے پر بھی بات چیت متوقع ہے۔
روسی وزیر داخلہ کا دورہ دونوں ممالک کے درمیان سفارتی اور ادارہ جاتی روابط کو وسعت دینے کا موقع فراہم کرے گا۔ چار روزہ دورے کے دوران ہونے والی ملاقاتوں اور بات چیت کے نتائج پر دونوں ممالک کے مستقبل کے تعاون کی پیش رفت کا انحصار ہوگا۔