اسلام آباد(جانب منزل نیوز) وزیراعظم شہباز شریف اور سربراہ جے یو آئی مولانا فضل الرحمان کے درمیان ٹیلی فونک رابطہ ہوا ہے، جس میں ملک کی موجودہ سیاسی صورتحال اور بالخصوص خیبرپختونخوا اور پی ٹی آئی لانگ مارچ پر تبادلہ خیال کیا گیا ہے۔
ذرائع کے مطابق وزیراعظم کی زیرِ صدارت اجلاس کے بعد رات گئے مولانا فضل الرحمان سے رابطہ کیا گیا، جس میں کے پی کی صورتحال اور پی ٹی آئی کے لانگ مارچ پر گفتگو ہوئی۔
رابطہ کے دوران مولانا فضل الرحمان نے اپنا مؤقف دہراتے ہوئے کہا کہ تمام سیاسی معاملات کو افہام و تفہیم سے حل کیا جائے۔
وزیراعظم شہباز شریف نے مولانا فضل الرحمان کی سیاسی خدمات اور مفاہمانہ انداز کو سراہتے ہوئے کہا کہ وفاقی حکومت اب بھی مذاکرات اور سیاسی حل کے لیے تیار ہے، تاہم اپوزیشن کو وفاق پر چڑھائی اور دھاوا بولنے سے گریز کرنا ہوگا، کیونکہ اس سے مسائل حل ہونے کے بجائے مزید پیدا ہوں گے۔
