امریکا (جانب منزل نیوز) آن لائن خرید و فروخت کی عالمی کمپنی ایمیزون کے اسمارٹ ہوم برانڈ ‘رِنگ’ نے ایک منفرد اسمارٹ لاک متعارف کرایا ہے۔ اس لاک کی سب سے بڑی خاصیت یہ ہے کہ اگر اس کی بیٹری مکمل طور پر ختم بھی ہو جائے تو سامنے موجود ڈائل کو چند بار گھما کر ہنگامی طور پر بجلی پیدا کی جا سکتی ہے۔
جدید ٹیکنالوجی سے لیس یہ اسمارٹ لاک دروازہ کھولنے کے لیے چار مختلف سہولیات فراہم کرتا ہے، جس میں فنگر پرنٹ سینسر، کی پیڈ کوڈ، اسمارٹ فون ایپ اور ایمیزون الیکسا شامل ہیں۔ اس میں صارفین کے لیے عارضی سکیورٹی کوڈز بنانے کا آپشن بھی موجود ہے، جس کے ذریعے کسی بھی سروس پرووائیڈر کو مخصوص وقت یا چند گھنٹوں کے لیے گھر میں داخلے کی اجازت دی جا سکتی ہے۔
کمپنی کے مطابق یہ لاک ایمیزون کی سائیڈ واک ٹیکنالوجی کو بھی سپورٹ کرتا ہے جو وائی فائی سگنل کمزور ہونے پر قریبی ایمیزون ڈیوائسز سے کنکشن برقرار رکھتا ہے۔ 249 ڈالر کی متوقع قیمت کا یہ اسمارٹ لاک 2027 کے اوائل میں سیاہ، سلور اور کانسی کے رنگوں میں فروخت کے لیے پیش کیا جائے گا
