اسلام آباد (جانب منزل نیوز) پاکستان اور امریکا کے درمیان کرکٹ روابط کو فروغ دینے کے لیے لاہور قلندرز نے بھرپور تعاون جاری رکھنے کے عزم کا اظہار کیا ہے۔ فرنچائز کے مالک اور ڈائریکٹر ثمین رانا نے امریکی کرکٹ اور وہاں کے کھلاڑیوں کی ترقی کے لیے ہر ممکن معاونت فراہم کرنے کا اعلان کیا ہے۔
ثمین رانا کا کہنا تھا کہ امریکا کے ساتھ لاہور قلندرز کے مضبوط روابط ہیں اور امریکی کرکٹرز کی حمایت ہمیشہ جاری رہے گی۔ ان کا مقصد دونوں ممالک کے کھلاڑیوں کو بہترین سہولیات اور یکساں مواقع فراہم کرکے کرکٹ تعلقات کو مزید وسعت دینا ہے۔
اس موقع پر لاہور قلندرز کے مالکان عاطف رانا اور ثمین رانا نے پاکستان ون ڈے ٹیم کے کپتان شاہین شاہ آفریدی کے ہمراہ امریکی سفارت خانے کی ناظم الامور نیٹلی اے بیکر کی جانب سے منعقدہ خصوصی تقریب میں شرکت کی۔
تقریب پاکستانی سفارتی ملازمین اور ان کے اہلخانہ کی خدمات کے اعتراف میں منعقد کی گئی، جہاں لاہور قلندرز کے وفد نے سفارتی عملے اور ان کے خاندانوں کے ساتھ وقت گزارا۔
لاہور قلندرز کے سی ای او عاطف رانا نے دعوت پر نیٹلی اے بیکر کا شکریہ ادا کیا، جبکہ امریکی ناظم الامور نے اپنے خطاب میں کرکٹ اور سفارت کاری میں ٹیم ورک کی اہمیت اجاگر کرتے ہوئے پاکستان اور امریکا کے درمیان تعاون کو دونوں ممالک کی سلامتی اور خوشحالی کے لیے اہم قرار دیا۔





