ویانا (جانب منزل نیوز)یورپ میں رواں موسم گرما کے دوران ریکارڈ توڑ گرمی کے باعث 50 ہزار 391افراد ہلاک ہوئے۔ اماراتی نیوز ایجنسی وام کے مطابق نیچر ہیلتھ کے آئندہ شمارے میں شائع ہونے والی تحقیق کے مطابق محققین نے جون، جولائی اور اگست کے دوران بار بار آنے والی گرمی کی شدید لہروں کے تناظر میں یورپ کے 854 شہروں میں مختلف عمر کے افراد کی گرمی سے ہونے والی اموات کا تخمینہ لگایا۔
تحقیق میں بتایا گیا کہ زیادہ درجہ حرارت کے باعث 50,391 افراد ہلاک ہوئے جن میں سے 32,619 اموات کوئلے، تیل اور گیس جلانے کے نتیجے میں پیدا ہونے والی اضافی گرمی کے باعث ہوئیں۔محققین کے مطابق یہ تعداد 2022 کے مقابلے میں 71 فیصد زیادہ ہے جب گرمی کے باعث 29,480 افراد ہلاک ہوئے تھے۔ انہی محققین نے رواں ماہ کے آغاز میں یورپ کے ان شہروں میں ہر سال موسم گرما کے دوران گرمی سے ہونے والی اموات کا جائزہ لینے پر مبنی ایک تحقیق بھی پیش کی تھی۔
تحقیق کے مصنفین نے کہا کہ رواں موسم گرما میں اموات کی اصل تعداد اس سے زیادہ ہو سکتی ہے کیونکہ ان اعداد و شمار میں مئی کے دوران آنے والی مہلک گرمی کی لہر سے ہونے والی اموات شامل نہیں ، مزید یہ کہ تحقیق صرف ان 854 شہروں تک محدود ہے جہاں یورپ کی تقریباً 40 فیصد آبادی رہتی ہے۔
