رسل برانڈ کے جرائم پر نیٹ فلکس کی دستاویزی فلم کا اعلان، 10 سال سے زائد قید کی سزا کے بعد نئی بحث چھڑ گئی

لندن (جانب منزل نیوز) برطانوی کامیڈین رسل برانڈ کی زندگی کا متنازع باب اب نیٹ فلکس کی دستاویزی فلم میں سامنے آنے والا ہے۔ ریپ اور جنسی حملوں کے مقدمات میں مجرم قرار دیے جانے اور 10 سال سے زائد قید کی سزا سنائے جانے کے چند روز بعد اسٹریمنگ پلیٹ فارم نے ’رسل برانڈ: اوپن سیکرٹ‘ کے نام سے ڈاکیومنٹری بنانے کی تصدیق کردی ہے۔
نیٹ فلکس نے انسٹاگرام کے ذریعے اس منصوبے کا اعلان کیا، جس نے انٹرٹینمنٹ کی دنیا میں ایک نئی بحث چھیڑ دی ہے۔ دلچسپ بات یہ ہے کہ اس دستاویزی فلم کا ذکر مقدمے کی سماعت کے دوران بھی سامنے آیا تھا، جب رسل برانڈ کے سابق دوست مارک پنیہیرو نے بتایا کہ ایک پروڈیوسر نے انہیں اس منصوبے کے حوالے سے رابطہ کیا تھا۔
عدالت میں متاثرہ خواتین کے بیانات نے اس کیس کی سنگینی کو نمایاں کیا۔ ایک خاتون نے اپنے ساتھ پیش آنے والے صدمے کو کبھی ختم نہ ہونے والی اذیت قرار دیا، جبکہ دوسری متاثرہ خاتون نے اپنی زندگی پر اس واقعے کے گہرے اثرات بیان کیے۔
رپورٹ کے مطابق رسل برانڈ کو سات الزامات کا سامنا تھا، جن میں سے چار سنگین جنسی جرائم میں جیوری نے انہیں مجرم قرار دیا۔ تاہم برانڈ ان الزامات کو مسترد کرتے رہے اور ان کا مؤقف تھا کہ تمام تعلقات باہمی رضامندی سے قائم ہوئے تھے۔
رسل برانڈ کے خلاف معاملہ 2023 میں دی سنڈے ٹائمز اور چینل فور کے مشترکہ تحقیقاتی پروگرام ’رسل برانڈ: اِن پلین سائٹ‘ کے بعد منظرعام پر آیا، جس کے نتیجے میں لندن کی میٹروپولیٹن پولیس نے تحقیقات کا آغاز کیا۔
تحقیقات کے دوران پولیس نے 100 سے زائد افراد کے انٹرویوز کیے، 400 سے زیادہ بیانات جمع کیے اور 1,400 سے زائد دستاویزات کا جائزہ لیا۔
دوسری جانب نیٹ فلکس کو رسل برانڈ کے اسٹینڈ اَپ شو ’ری: برتھ‘ کو پلیٹ فارم پر برقرار رکھنے پر بھی تنقید کا سامنا ہے۔ نیٹ فلکس کے مطابق شو کو صارفین کو خودکار طور پر تجویز یا فعال انداز میں پروموٹ نہیں کیا جائے گا، تاہم تلاش کے ذریعے اسے دیکھا جاسکے گا۔
دستاویزی فلم کی ریلیز کی تاریخ، دورانیے اور اس میں شامل افراد کے نام تاحال سامنے نہیں آئے۔ اب دیکھنا یہ ہے کہ نیٹ فلکس اس حساس کہانی میں متاثرہ خواتین کے مؤقف، عدالتی کارروائی اور طاقتور شخصیات کے احتساب کے پہلوؤں کو کس انداز میں پیش کرتا ہے۔