دبئی میٹرو کی نئی منزل المکتوم ایئرپورٹ، 2 ارب درہم کا میگا منصوبہ منظور

دبئی (جانب منزل نیوز) دبئی نے مستقبل کے سفری نظام میں ایک اور بڑی چھلانگ لگانے کی تیاری کرلی۔ دبئی کے ولی عہد شیخ حمدان بن محمد بن راشد المکتوم نے دبئی میٹرو کو المکتوم انٹرنیشنل ایئرپورٹ سٹی تک توسیع دینے کے لیے 2 ارب درہم کے اہم منصوبے کی منظوری دے دی۔ منصوبے کے تحت 3 کلومیٹر طویل نئی میٹرو لائن تعمیر ہوگی اور دو نئے اسٹیشن قائم کیے جائیں گے، جنہیں 2031 تک فعال کرنے کا ہدف مقرر کیا گیا ہے۔
توسیع موجودہ روٹ 2020 کو المکتوم انٹرنیشنل ایئرپورٹ سٹی سے منسلک کرے گی، جس کے نتیجے میں ایئرپورٹ کے ویسٹ ٹرمینل تک براہِ راست میٹرو رسائی ممکن ہوگی۔ مستقبل میں ایئرپورٹ آنے اور جانے والے لاکھوں مسافروں، ملازمین اور زائرین کے لیے سفر مزید آسان اور سہل ہو جائے گا۔
منصوبے کی نمایاں خصوصیت یہ ہے کہ دبئی میٹرو کو ایئرپورٹ ایکسپریس لائن اور اتحاد ریل کے تیز رفتار ریلوے نیٹ ورک سے بھی جوڑا جائے گا۔ اس طرح دبئی میں مختلف سفری ذرائع ایک مربوط نظام کے تحت کام کریں گے اور مسافروں کو ایک جگہ سے دوسری جگہ منتقل ہونے میں زیادہ سہولت ملے گی۔ منصوبے پر دبئی کی روڈز اینڈ ٹرانسپورٹ اتھارٹی اور دبئی انجینئرنگ پراجیکٹس اسٹیبلشمنٹ مشترکہ طور پر کام کریں گے۔
نئی میٹرو لائن سے نجی گاڑیوں پر انحصار کم کرنے، سڑکوں پر ٹریفک کا دباؤ گھٹانے اور رہائشی و تجارتی مراکز تک رسائی بہتر بنانے میں مدد ملنے کی توقع ہے۔ یہ منصوبہ المکتوم انٹرنیشنل ایئرپورٹ کو مستقبل کے بڑے عالمی ہوا بازی مرکز کے طور پر ترقی دینے کی حکمتِ عملی کا اہم حصہ ہے۔
شیخ حمدان بن محمد کے مطابق دبئی مستقبل کی ضروریات کو سامنے رکھتے ہوئے جدید انفراسٹرکچر میں سرمایہ کاری جاری رکھے گا تاکہ شہر کے مختلف علاقوں کو بہتر انداز میں جوڑنے کے ساتھ عالمی سطح پر دبئی کی مسابقتی حیثیت بھی مزید مضبوط بنائی جا سکے۔
میٹرو توسیع کے ساتھ دبئی میں عوامی خدمات اور کمیونٹی سہولتوں کی ترقی کے لیے 9.59 ارب درہم کا منصوبہ بھی منظور کیا گیا ہے، جس پر 2040 تک مرحلہ وار عمل درآمد ہوگا۔ اس کے تحت صحت، تعلیم، کھیل، تحفظ اور سلامتی کی سہولتیں بہتر بنائی جائیں گی، جبکہ بزرگ شہریوں اور خاندانوں کے لیے بھی خصوصی سہولتیں فراہم کی جائیں گی۔
دبئی کی رئیل اسٹیٹ مارکیٹ کے مستقبل سے متعلق تحقیق میں 2030 تک 3 لاکھ 65 ہزار نئی رہائشی یونٹس کی تعمیر متوقع ظاہر کی گئی ہے۔ اس کے علاوہ دفاتر اور تجارتی مراکز کے لیے تقریباً 11 لاکھ مربع میٹر اضافی جگہ تیار کرنے کا منصوبہ بھی شامل ہے۔ دبئی کی رئیل اسٹیٹ حکمتِ عملی 2033 کے تحت جائیداد کے لین دین کی مجموعی مالیت ایک کھرب درہم تک پہنچانے کا ہدف مقرر کیا گیا ہے۔
دبئی کے یہ منصوبے جدید سفری سہولتوں، شہری ترقی اور عالمی سرمایہ کاری کے نئے امکانات پیدا کرنے کی جانب ایک اہم پیش رفت ہیں، جس سے شہر کے مستقبل کے ٹرانسپورٹ نظام کو مزید مضبوط بنانے میں مدد ملے گی۔