دبئی کی ترقی کے لیے 11 ارب درہم کا تاریخی پیکیج، شیخ حمدان نے مستقبل کا روڈ میپ پیش کر دیا

دبئی (جانب منزل نیوز) دبئی نے مستقبل کی ترقی کے لیے ایک اور بڑا قدم اٹھا لیا، ولی عہد دبئی شیخ حمدان بن محمد بن راشد المکتوم نے 11 ارب درہم سے زائد مالیت کے ترقیاتی منصوبوں کی منظوری دے دی۔ ان منصوبوں میں جدید شہری سہولتوں کی فراہمی، میٹرو نیٹ ورک کی توسیع اور دبئی کو عالمی معیار کے مربوط شہر میں تبدیل کرنے کا جامع منصوبہ شامل ہے۔
منظور شدہ پیکیج کے تحت 2040 تک کمیونٹی سروسز اور عوامی سہولتوں کی ترقی پر 9.59 ارب درہم خرچ کیے جائیں گے، جبکہ دبئی میٹرو کو المکتوم انٹرنیشنل ایئرپورٹ سٹی تک توسیع دینے کے لیے 2 ارب درہم مختص کیے گئے ہیں۔
دبئی میٹرو منصوبے کے تحت 3 کلومیٹر طویل نئے ٹریک پر دو اسٹیشن تعمیر کیے جائیں گے، جو روٹ 2020 کو المکتوم انٹرنیشنل ایئرپورٹ سٹی سے منسلک کریں گے۔ منصوبے کی تکمیل کے بعد میٹرو کا رابطہ ایئرپورٹ کے ویسٹ ٹرمینل، ایئرپورٹ ایکسپریس لائن اور اتحاد ریل کے تیز رفتار نیٹ ورک سے بھی قائم ہوگا۔ نئی سروس 2031 میں شروع کرنے کا ہدف ہے۔
2040 کے کمیونٹی پلان میں صحت، تعلیم، کھیل، تحفظ اور سلامتی کی سہولتوں کو ترجیح دی گئی ہے۔ بزرگ شہریوں، خاندانوں اور مختلف نسلوں کی ضروریات کو مدنظر رکھتے ہوئے کمیونٹی سرگرمیوں کے لیے خصوصی مقامات بھی تیار کیے جائیں گے۔
دبئی کی رئیل اسٹیٹ مارکیٹ کو مزید مضبوط بنانے کے لیے 2030 تک 3 لاکھ 65 ہزار نئی رہائشی یونٹس کی تعمیر متوقع ہے۔ اس کے علاوہ دفاتر اور ریٹیل شعبے کے لیے تقریباً 11 لاکھ مربع میٹر نئی جگہ بھی تیار کی جائے گی۔ دبئی کی رئیل اسٹیٹ حکمتِ عملی 2033 کے تحت جائیداد کے لین دین کی مجموعی مالیت ایک کھرب درہم تک پہنچانے کا ہدف مقرر کیا گیا ہے۔
اوقاف دبئی کی نئی سرمایہ کاری پالیسی کے تحت 2030 تک رئیل اسٹیٹ پورٹ فولیو میں 10 ارب درہم اضافے اور سیکیورٹیز پورٹ فولیو میں 35 فیصد سے زیادہ ترقی کا ہدف رکھا گیا ہے۔ 2025 میں وقف اثاثوں کی مالیت 13.5 ارب درہم تک پہنچ چکی تھی۔
شیخ حمدان کے مطابق دبئی کی ترقی کا مقصد صرف جدید انفراسٹرکچر کی تعمیر نہیں بلکہ شہریوں اور رہائشیوں کے معیارِ زندگی کو بہتر بنانا بھی ہے۔ نئے منصوبے دبئی کو عالمی سطح پر مزید مربوط، پُرکشش اور سرمایہ کاری کے لیے مسابقتی شہر بنانے میں اہم کردار ادا کریں گے۔